Dortmund-sjefen om tida etter Haaland: – Vi finn ein ny toppspiss

Erling Braut Haaland blir vanskeleg å behalde, erkjenner Borussia Dortmund-direktør Hans-Joachim Watzke. Han hintar om at klubben ser etter ein erstattar.

Det kjem fram i eit intervju Watzke i helga gav til Welt am Sonntag. Dortmund greidde i sommar å halde på Haaland, men det blir truleg langt meir vrie å gjenta neste år.

– Sjølvsagt blir det tøft, men eg seier ikkje at det er heilt umogleg. Vi vil gjere alt for å halde dei beste spelarane våre lojale til oss i framtida, seier Watzke.

Han meiner klubben må ha nok tru på seg sjølv til at han vil takle eit Haaland-sal.

– Vi er nøydde til å ha sjølvtilliten til å seie at vi vil finne ein ny toppspiss.

Søndag plussa Haaland på to nye mål til den allereie ville Dortmund-statistikken sin. Der står han bokført med 68 skåringar på 67 kampar. Sommarvindauget 2022 er venta å bli dominert av Haaland-spekulasjonar.

Kontrakten til jærbuen med Dortmund varer til 2024, men det er rapportert at ein utkjøpsklausul vil gjelde frå neste sommar. Summen skal liggje på ein stad mellom 75 og 100 millionar euro.

(©NPK)

Erling Haaland feirar etter å ha scora to mål for Borussia Dortmund søndag. Foto: Martin Meissner / AP / NTB

Annonse
Annonse