Dronning Sonja rørt og imponert av Mark (37)
Mark Wang takkar dronning Sonja for at han fekk bygd ein vidaregåande skule med 560 elevar i Kina. - Eg er djupt, djupt imponert, seier Sonja.
Då Mark Jiapeng Wang frå Kina var ungdom, fekk han eit stipend frå dronninga. Slik enda han opp på United World College i Fjaler i Sogn og Fjordane - ein vidaregåande skule der elevar frå heile verda er samla.
- Stipendet endra livet mitt frå det som kan beskrivast som eit svart-kvitt-TV til eit farge-TV. Det betydde så mykje for meg. Derfor ville eg lage denne skulen i Kina, slik at fleire og fleire studentar kan oppleve det same som eg gjorde og få liva sine endra, seier han.
Besøkte sjukehuset
Det var det førre statsbesøket til kongeparet i Kina i 1997 som skulle endre livet til Wang, som vart lam i beina etter ei flyulykke som 12-åring. Kongeparet besøkte sjukehuset der han var innlagt, og lyste i ettertid ut eit stipend til éin av pasientane - som Wang fekk.
Dermed bar det til Noreg.
- På skulen der eg gjekk i Sogn og Fjordane, kjem det folk frå 80 forskjellige land. Vi bur saman, vi studerer saman og vi kan tenkje på korleis vi kan skape fred i verda saman, seier Wang.
- Tusen takk
Heilt sidan opphaldet i Sogn og Fjordane, har han drøymt om å lage ein lik skule i Kina. Etter mange år med hardt arbeid, gjekk draumen i oppfylling då United World College Changsu China vart opna i 2015.
Skulen har 560 elevar frå 99 land, og fredag besøkte kongeparet for første gong skuleområdet 110 kilometer vest for Shanghai. Dei var tydeleg rørt over å sjå kva Wang har fått til.
- Det har vore ei utruleg flott reise å få lov til å følgje med på alt det du har gjort og fått til. Det er berre heilt beundringsverdig at du har fått til denne utruleg flotte staden. Det er stort å få lov til å vere her i dag, Mark. Tusen, tusen takk, sa dronninga.
Etter besøket på skulen, drog kongeparet vidare til ein av av dei vakraste hagane i Kina, «Humble Administrator´s Garden» i Suzhou. Det var siste post på det ni dagar lange statsbesøket i Kina.
(©NPK)
Kong Harald og dronning Sonja besøkte fredag United World College i Changsu 110 kilometer vest for Shanghai, der dei vart viste rundt av grunnleggar og styreformann Mark Jiapeng Wang. Foto: Heiko Junge / NTB scanpix / NPK
Kong Harald og dronning Sonja besøkte fredag United World College i Changsu 110 kilometer vest for Shanghai, der de vart vist rundt av grunnleggar og styreformann Mark Jiapeng Wang. Foto: Heiko Junge / NTB scanpix / NPK
Gruppebilde med kong Harald og dronning Sonja som besøkte United World College i Changsu 110 kilometer vest for Shanghai fredag. Der vart die vist rundt av grunnleggar og styreformann Mark Jiapeng Wang. Fleire av elevane hadde tatt på seg nasjonaldraktene frå heimlandet.
Foto: Heiko Junge / NTB scanpix / NPK
Etter besøket på skulen drog kongeparet vidare til ein av dei vakraste hagane i Kina, «Humble Administrator´s Garden» i Suzhou. Det var siste post på det ti dagar lange statsbesøket i Kina. Foto: Heiko Junge / NTB scanpix / NPK
