Ekspertar ønsker retningslinjer for nedkjølte pasientar - Helsedirektoratet seier nei
Fleire ekspertar etterlyser nasjonale retningslinjer for behandling av sterkt nedkjølte pasientar. Helsedirektoratet seier dei ikkje vil prioritere det.
Ei sterkt nedkjølt kvinne vart i februar frakta til Molde sjukehus, der ho vart erklært død. Då kvinna skulle undersøkjast av politiet rørte ho på seg, og det viste seg at kvinna framleis var i live.
Hendinga vart omtalt som eit tilfelle av såkalla aksidentell hypotermi, som inneber at kroppstemperaturen fell som følgje av ulykker, skader eller forgiftingar.
Ei rekke ekspertar etterlyser no nasjonale retningslinjer for korleis slike saker skal handterast av helsevesenet, skriv NRK.
- Retningslinjer som ikkje er gitt ut av Helsedirektoratet er ikkje bindande for helsepersonell. Derfor er det så avgjerande å få på plass dette, seier professor Torben Wisborg ved universitetet i Tromsø. Wisborg har lang erfaring med saker knytt til behandling av sterkt nedkjølte personar.
Ved tilfelle av sterkt nedkjølte personar finst det faglege retningslinjer ved fleire helseføretak rundt om i landet, men ingen nasjonale. Det er det heller ingen planar om, ifølgje Helsedirektoratet.
- Dette tilfellet har nok ikkje nådd heilt opp blant andre prioriterte problemstillingar. Men vi vurderer fortløpande alle forslag om nasjonale faglege retningslinjer. Dette gjer vi etter klare kriterium, seier avdelingsdirektør Morten Græsli i Helsedirektoratet.
(©NPK)
