El Clásico utsett på grunn av uro i Barcelona
El Clásico i fotball mellom Barcelona og Real Madrid neste helg er utsett på ubestemt tid. Årsaka er uroa i Catalonia.
Det er det spanske fotballforbundet (RFEF) som har avgjort at kampen blir utsett.
Dei gav beskjed om at klubbane har helga på seg til å finne ein ny dato. Seinare fredag vart Barcelona og Real Madrid samde om at onsdag 18. desember er det beste alternativet. No står det berre att at RFEF og den spanske ligaen godkjenner datoen.
RFEF meiner i utgangspunktet at laurdag 7. desember er eit betre tidspunkt fordi det er ei meir gunstig TV-tid.
Det er uroa i Catalonia som set ein stoppar for at kampen blir spelt neste helg. Protestane i Barcelona starta då ni katalanske politikarar som ønsker lausriving frå Spania måndag vart dømde til lange fengselsstraffer. Mange har vorte skadde i samanstøytane mellom politi og demonstrantar i Barcelona og andre byar i Catalonia.
Den spanske ligaen (LFP) foreslo først å flytte kampen til 18. desember, før dei så foreslo å byte rekkefølgje på oppgjeret slik at kampen skulle spelast i Madrid.
(©NPK)
Barcelona og Lionel Messi får ikkje spele oppgjeret mot Real Madrid i Barcelona neste helg. No er kampen utsett på ubestemt tid grunna uro i Catalonia. Foto: Emilio Morenatti / AP / NTB scanpix.
