Erik Valnes jubla for sin første NM-tittel
Sprintaren Erik Valnes gjekk inn til gullet på 10 kilometer klassisk under ski-NM i Granåsen. Daniel Stock tok sølvet og Martin Løwstrøm Nyenget bronse.
Sprintaren Valnes var den raskaste frå start til mål. Nyenget var berre 1,2 sekund bak løparen frå Bardufoss etter to kilometer, men hadde tapt ytterlegare ved runding.
Valnes hadde kontroll på konkurrentane undervegs og tok den første NM-tittelen på seniornivå.
– Det var skikkeleg rått. Det var vel første pallplassen min som senior på sprinten, og no kom den første sigeren. Det er jo eigentleg dette eg trenar for. Eg prøver å sjå kor god eg kan bli på distanse. Det var eit godt løp frå start til mål, sa han til NRK.
Daniel Stock frå Vadsø blanda seg òg inn i medaljekampen bak Valnes og kneip sølvet med ei solid avslutning. Han enda 8,9 sekund bak. Nyenget på tredjeplass var 18,2 sekund bak.
Heimefavoritten Johannes Høsflot Klæbo vart vist til den sure fjerdeplassen. Han var berre 0,4 sekund frå bronse.
Det var mange favorittar på øvinga med ei blanding av gode sprintarar, gode langdistanseløparar og nokre sterke juniorar.
Distansen er ikkje VM-øving og blir gått normalt under 2.-del av NM, som blir avvikla seinare i sesongen. Også NM del 2 skal gå i Granåsen, i tidsrommet 25. til 27. mars.
(©NPK)
Erik Valnes tok gull på 10 kilometer klassisk under ski-NM i Granåsen. Foto: Geir Olsen / NTB
