Nordre

Erna Solberg er framleis Noregs mektigaste kvinne

Statsminister Erna Solberg (H) er igjen øvst på lista over Noregs mektigaste kvinner. Politikarar dominerer, men kvinnedelen på Oslo Børs er rekordhøg.

Statsminister Erna Solberg (H) er igjen øvst på lista over Noregs mektigaste kvinner. Politikarar dominerer, men kvinnedelen på Oslo Børs er rekordhøg.

Finanstidsskriftet Kapital kårar igjen Noregs mektigaste kvinner.

Ikkje overraskande tronar Solberg øvst på lista - for sjuande året på rad. Ho blir følgd av finansminister Siv Jensen (Frp), utanriksminister Ine Eriksen Søreide (H) og kulturminister Trine Skei Grande (V).

Meir oppsiktsvekkjande er det at delen av verdiane på Oslo Børs som blir styrte av kvinnelege sjefar, har firedobla seg frå i fjor.

Kristin Skogen Lund er på åttandeplass på årets liste, etter å ha vorte konsernsjef i Schibsted. Kapital meiner Lund er den mektigaste kvinna innan norsk mediebransje nokon gong.

Historisk høg kvinnedel

På plassen bak følgjer Norsk Hydros nye konsernsjef Hilde Merete Aasheim. Ho er den einaste kvinna i norsk næringsliv som leiar ei bedrift med godt over 100 milliardar kroner i omsetning, påpeikar Kapital.

Lund og Aasheim gjer kvinnedelen på Oslo Børs historisk høg.

I 2018 var berre 1,5 prosent av marknadsverdien på børsen styrt av selskap med kvinnelege leiarar, medan det i år er 6 prosent.

Delen kan auke vesentleg

Kapital peikar på at denne delen i nær framtid kan auke betydeleg, og gjere Noreg verdsleiande på kvinnelege leiarar på børsen.

Både i DNB, Equinor og Orkla er kvinnelege kandidatar aktuelle som moglege nye konsernsjefar.

I DNB er finansdirektør Kjerstin Braathen aktuell som arvtakar for Rune Bjerke. Ho er på 29.-plass på årets liste over Noregs mektigaste kvinner.

I Equinor kan konserndirektør Jannicke Nilsson, på 25.-plass på årets liste, ta over som sjef, og i Orkla er konserndirektør Ann-Beth Freuchen ein mogleg kandidat som ny sjef.

Skulle alle desse tre selskapa få kvinneleg sjef, vil over 40 prosent av verdiane på børsen - ut frå dagens marknadsverdiar - styrast av selskap med kvinner i sjefsstolen.

Ut av lista

Både Linda Hofstad Helleland (H) og Åse Michaelsen (Frp) er ute av årets liste etter å ha måtta fråtre som høvesvis barne- og familieminister og eldre- og folkehelseminister. Helleland kom i fjor på åttande plass, medan Michaelsen kom på 14.-plass.

Berit Svendsen kom i fjor på 13.-plass, men er i år falle heilt ned til 100.-plass etter at ho måtte gå frå stillinga som konserndirektør i Telenor. Ho er no på lista i eigenskap av den nye stillinga si som leiar for den internasjonale satsinga til den digitale betalingstenesta Vipps.

(©NPK)

Statsminister Erna Solberg og finansminister Siv Jensen er Noregs mektigaste og nest mektigaste kvinne, ifølgje den årlege lista til Kapital. Foto: Terje Bendiksby / NTB scanpix

ANNONSE
Annonse
ANNONSE
Annonse