EU ber Tyskland bruke meir og Italia bruke mindre i budsjettet for neste år
EU ber euroland med romslege budsjett om å bruke meir pengar for å få fart på økonomien. Dei som har mykje gjeld, blir bedne om å stramme inn.
Denne veka kom EU med tilrådingane sine basert på budsjettforslaga i dei 19 eurolanda. EU-kommisjonens visepresident Valdis Dombrovskis seier det er tryggande å sjå at enkelte land er i stand til å bruke finanspolitikken til å støtte opp om investeringar, og han trekker fram Tyskland og Nederland.
- Det er likevel rom for å gjere meir, seier Dombrovskis, som også tidlegare har oppmoda Tyskland til å bruke meir pengar på å stimulere økonomien i landet.
I den andre enden av skalaen er han opptatt av at land med høg gjeld, som ikkje oppfyller krava i den såkalla stabiliserings- og vekstpakta, bør halde igjen på pengebruken. Her nemner han Belgia, Frankrike, Italia og Spania. Dette er land der gjelda er på rundt 95-130 prosent av bruttonasjonalprodukt (BNP), mot målet til pakta om at den skal vere under 60 prosent. Dersom gjelda er høgare, bør budsjetta bidra til å redusere ho.
- Desse bør nytte den lågare rentekostnaden til å redusere gjelda. Det bør vere deira prioritet, seier Dombrovskis.
Hellas og Portugal har òg skyhøg gjeld, høvesvis rundt 170 og 120 prosent av BNP, men har i motsetning til dei fire andre landa budsjettplanar som legg opp til å få ned gjelda.
(©NPK)
EU ber Tyskland bruke meir pengar. Foto: AP / Kirsty Wigglesworth / NTB scanpix
