EU forbyr eingongsplast
EU har no banka igjennom det varsla forbodet mot q-tips, sugerøyr, plastbestikk og andre eingongsartiklar av plast.
Det opplyser EUs austerrikske formannskap onsdag morgon.
Forliket kom på plass etter eit meir ein tolv timar langt forhandlingsmøte mellom EU-parlamentet, ministerrådet og EU-kommisjonen.
Avtalen må no formelt godkjennast. Så trer forbodet i kraft om to år. Også Noreg vil etter alle solemerke bli bunde av dei nye reglane.
Føremålet er å bli kvitt plastartiklane som skaper mest forsøpling i strandkanten i Europa.
- Vi har alle høyrt åtvaringa om at målt i vekt vil det vere meir plast enn fisk i hava innan 2050, viss vi held fram å dumpe plast i hava i same omfang som i dag. Vi kan ikkje la det skje, seier Austerrikes miljøvernminister Elisabeth Köstinger.
På forbodslista står:
plastbestikk
plasttallerkenar
plastkoppar
sugerøyr av plast
visse typar matbehaldarar av plast
visse typar drikkebehaldarar av plast
bomullspinnar av plast
EU-kommisjonen jublar over forliket.
- Når vi har ein situasjon der du ber fisken heim i ein plastpose det eine året, og så ber plastposen heim i fisken det neste, så er det klart at vi må jobbe hardt og jobbe raskt, seier EUs miljøkommissær Karmenu Vella.
(©NPK)
EU-kommisjonens sjef Jean-Claude Juncker og teamet hans la i mai fram forslag om forbod mot unødvendige eingongsartiklar av plast. No er forbodet banka gjennom. Foto: AP / NTB scanpix
