FA: Ronaldo risikerer straff etter bråk mot Everton-supporter

Cristiano Ronaldo kan risikere straff etter at han slo mobilen ut av handa på ein tilskodar etter 0-1-tapet mot Everton 9. april i år.

Det engelske fotballforbundet (FA) opplyser fredag at saka skal undersøkjast.

«Det blir påstått at framferda til spissen etter sluttsignalet var upassande og/eller valdeleg», står det i ei fråsegn frå ein talsperson i forbundet delt på Twitter.

I fleire videoar delt i sosiale medium kan ein sjå at Ronaldo er på veg inn i spelartunnelen då han i frustrasjon slår mobilen til ein Everton-supporter ut av hendene til vedkommande.

Ronaldo gjekk kjapt ut i sosiale medium og beklaga åtferda. Han inviterte også Everton-supporteren til Old Trafford på kamp.

Viss den portugisiske stjernespelaren blir funnen skuldig, vil han truleg måtte sone karantene i dei neste Premier League-kampane.

(©NPK)

Manchester United-spelar Cristiano Ronaldo kan risikere straff etter bråk mot ein Everton-supporter etter 1-0-tapet mot Everton 9. april. Foto: Dave Thompson / AP / NTB

Annonse
Annonse