Færre bebuarar på norske asylmottak
Ved utgangen av oktober budde det 3.930 personar frå 42 ulike land på asylmottak her i landet. Det er vel 1.100 færre enn ved årsskiftet.
Nytt av året er at det er flest tyrkiske borgarar på asylmottaka, til saman 671 personar, viser tal frå Utlendingsdirektoratet (UDI). Deretter følgjer eritrearar med 594, etiopiarar med 406, syrarar med 398 og afghanarar med 385 personar. 30 prosent av bebuarane på asylmottaka er under 18 år.
Berre 44 prosent av bebuarane ventar på svar på asylsøknad eller har ein klage på avslag inne til handsaming. Nesten ein tredel har fått endeleg avslag på asylsøknaden og har utreiseplikt. Ei tredje stor gruppe ventar på busetjing i ein kommune.
UDI har i år redusert søknadsbunken med 2.122 asylsøknader, i alt har 1.105 personar fått innvilga søknaden om opphald i Noreg.
Til saman er det komme 2.708 asylsøkarar frå 97 land til Noreg i dei ti første månadane i år, vel 500 færre enn til same tid i fjor. Berre fem land har eit tresifra tal søkarar i år. Tyrkia toppar lista med 690 asylsøknader, følgt av Afghanistan, Syria, Eritrea og Iran. 36 prosent av asylsøkarane i år er kvinner.
(©NPK)
UDI har i år sagt ja til vel 1.100 asylsøkarar. Foto: Gorm Kallestad / NTB scanpix
