Fifa: Mållinjeteknologi godkjende Japans omdiskuterte vinnarmål mot Spania
Fifa seier at VAR-dommarane brukte mållinjeteknologi for å stadfeste at ballen var i spel då Japan skåra sigersmålet mot Spania og gjekk vidare i fotball-VM.
Ao Tanaka tuppa ballen i mål etter 51 minutt i oppgjeret torsdag, men situasjonen i forkant har skapt diskusjonar i fotballmiljøet. Fleire har reagert og meint at Kaoru Mitoma ikkje rakk ballen nede ved dødlinja før han slo den vidare. Argumentet har derfor vore at sigersmålet aldri burde vorte godkjent.
Fredag seier Det internasjonale fotballforbundet at teknologi vart brukt for å stadfeste at ballen var i spel på pasninga som førte til målet.
«Japans andre mål i 2-1-sigeren over Spania vart sjekka av VAR for å finne ut om ballen var utanfor banen. VAR-dommarane brukte mållinjeteknologi for å sjekke om ballen var delvis inne», heiter det i ei fråsegn.
«Andre kameravinklar kan gi eit feilaktig bilete, men ut frå bevisa var ballen aldri ute av spel», skriv Fifa vidare.
Med sigeren vart Japan gruppevinnar og møter Kroatia i åttedelsfinalen.
(©NPK)
Fifa stadfestar at Kaoru Mitoma rakk ballen på pasningen som førte til Japans vinnarmål mot Spania. Foto: Petr David Josek / AP / NTB
