Fifa-rapport: Lågaste pengebruk sidan 2016

Ikkje sidan 2016 har klubbane brukt mindre pengar på spelarovergangar i profesjonell herrefotball, ifølgje ein rapport frå Det internasjonale fotballforbundet.

Fotballverda har ofte fått kritikk mot seg på grunn av dei enorme summane som har vore i omløp dei siste åra. Ferske tal frå Fifa antydar likevel at koronapandemien har lagt ein dempar på den heilt store pengebruken.

I 2021 brukte klubbane i overkant av 42,1 milliardar kroner på spelarkjøp. Det er ein nedgang på 13,6 prosent samanlikna med 2020 og ein nedgang på heile 33,8 prosent samanlikna med rekordåret 2019, då det vart brukt 63,8 milliardar kroner.

I 2016 brukte klubbane 41,6 milliardar kroner, altså hårfint mindre enn i fjor. Etter mange år med vekst fall totalbeløpet på spelarovergangar i 2020 til 48,8 milliardar kroner.

Fleire kjøp – lågare summar

Samtidig har talet på spelarovergangar vakse. 18.068 overgangar er ein klar auke i forhold til 2020 og berre tolv handlar færre enn i 2019, då det vart sett rekord.

Klubbane trong dermed å friske opp troppane sine, men var ikkje villige til å bruke dei same summane som før, konkluderer Fifa i rapporten.

Eliteserien eksporterer

Dei norske klubbane er blant dei som kan sjå tilbake på eit år i pluss. I norsk herrefotball vart det gjennomført 310 overgangar i 2021. Av desse var 168 innkommande overgangar til norske klubbar, medan delen selde spelarar var 142.

Dei norske klubbane brukte i alt 66,9 millionar kroner på spelarkjøp, medan det vart det selt for heile 329,3 millionar kroner.

Bodø/Glimt har stått for mange av dei store overgangane ut av norsk fotball dei siste sesongane, og klubben har òg opna 2022 med to kjempesal av Erik Botheim (Krasnodar, Russland) og Patrick Berg (Lens, Frankrike).

(©NPK)

President Gianni Infantino og Fifa har merka seg påverknaden til pandemien på overgangsmarknaden i fotballen. Foto: Torstein Bøe / NTB

ANNONSE
Annonse
ANNONSE
Annonse
ANNONSE
Annonse