Flaggar på halv stong i 30 dagar til minne om Ginsburg
USAs høgsterett har vedteke å flagge på halv stong i 30 dagar til minne om høgsterettsdommar Ruth Bader Ginsburg som døydde fredag.
I tillegg til at flagget på plassen utanfor høgsterettsbygningen er fira på halv stong, er det hange opp svarte gardiner framfor inngangen til rettssalen, skriv nyheitsbyrået Reuters.
Ginsburg, som i nesten tre tiår var ein markant forkjempar for kvinners rettar og likestilling i USA, døydde av kreft. Ho vart 87 år gammal.
I ei fråsegn søndag seier høgsterett at Ginsburgs plass i salen, og plassen framfor han, også er dekt med eit svart, tynt ullstoff, slik tradisjonen er når ein sitjande høgsterettsdommar døyr.
Mange har i helga besøkt trappa framfor bygningen for å leggje ned blomstrar og sørgje over høgsterettsdommaren, som i sine siste år var den klare leiaren for den liberale fløya i retten.
(©NPK)
USAs høgsterett har bestemt å flagge på halv stong i 30 dagar til minne om høgsterettsdommar Ruth Bader Ginsburg som døydde fredag. Foto: J. Scott Applewhite / AP / NTB
