Fleire teststasjonar i Oslo droppar drop-in

Mange av Oslo kommunes teststasjonar går vekk frå drop-in til fordel for å berre ta imot timebestillingar for koronatestar.

Tiltaket trer i kraft frå tysdag denne veka, opplyser kommunen i ei pressemelding.

Målet er både å redusere kø ved teststasjonane og dessutan å leggje til rette for ei meir føreseieleg bemanning.

– For å komme innbyggjarar som er mindre kjende med digitale løysingar i møte, vil drop-in-tilbodet framleis haldast oppe på enkelte testlokasjonar. Det er òg mogleg å bestille time for test via koronatelefonen dersom det ikkje er mogleg å bestille time på nett, heiter det i pressemeldinga.

Teststasjonen på Adamstuen i nærleiken av Ullevål sjukehus er blant stadene som no går over til berre timebestillingar. Stasjonen på Grønland torg vil på si side berre ta imot drop-in.

(©NPK)

Adamstuen teststasjon i Oslo har vore eit travelt drop-in-senter gjennom heile pandemien. Foto: Ørn E. Borgen / NTB

Annonse
Annonse