Flyktningar mest opptekne av å bli norske statsborgarar

Mens flyktningar, spesielt frå Asia og Afrika, byter statsborgarskapet sitt til norsk, beheld europeiske arbeidsinnvandrarar det opphavlege statsborgarskapet sitt.

Heile 70 prosent av innvandrarar frå Asia som kom til Noreg i perioden 1968 til 2007, vart løyvd norsk statsborgarskap mellom 1977 og 2017, viser tala frå Statistisk sentralbyrå (SSB). Særleg på midten av 90-talet var det veldig vanleg at flyktningar frå Iran, Vietnam og Sri Lanka skifta statsborgarskap.

På andreplass kjem personar frå Afrika der 69 prosent har skifta til norsk statsborgarskap. Av desse utgjer somaliarar heile 54 prosent i perioden 2003-2011. I europeiske land utanfor EU/EØS er delen 56 prosent.

Også europeiske arbeidsinnvandrarar byter til norsk statsborgarskap, men i mindre grad enn andre. Tala for arbeidsinnvandrarar frå perioden 1990 til 2007 viser at berre 3 prosent av arbeidsinnvandrarar frå EU/EØS-land byte til norsk statsborgarskap.

SSB meiner at dette kjem av at ein god del av dei planlegg å reise tilbake til heimlandet eller flytte til eit anna EU-land.

(©NPK)

Annonse
Annonse