Nordre

Forslaget frå Newcastle-sjefen: PL-fotball kvar dag

Newcastle-manager Steve Bruce er innstilt på å fullføre Premier League-sesongen og foreslår ein «fotball-festmånad» med kampar kvar dag.

Inntil vidare er Premier League-sesongen utsett til 30. april som følgje av koronavirus-pandemien, og det er heilt klart at han ikkje kan fullførast som planlagt 17. mai. Bruce er blant dei som er villig til å tøye strikken langt for å spele 2019/20-sesongen ferdig når fotballen igjen kan rulle på Dei britiske øyane.

– Vi må prøve å få fullført sesongen, koste kva det koste vil. Alle ønsker det, seier Bruce i eit intervju med avisa Daily Telegraph.

– Vi kan ha ein «fotball-festmånad». Kampar kvar dag, og laga speler to eller tre kampar i veka. Det er ikkje ideelt, men når vi kan spele 10–15 kampar i desember og starten av januar, kan vi klare det for å fullføre denne sesongen, seier Newcastle-manageren og held fram:

– Det betyr sannsynlegvis at starten på neste sesong må utsetjast. Vi må sannsynlegvis òg stryke ein av cupane og klare oss utan ein vinterpause. Men det er mogleg. Uansett skal vi finne ein måte å gjere det på.

Bruces lag ligg på 13.-plass i Premier League med ni rundar igjen å spele. Newcastle er òg klar for kvartfinale i FA-cupen, der dei etter planen skal spele heimekamp mot tittelforsvarar Manchester City.

(©NPK)

Newcastle-manager Steve Bruce kjem med eit kreativt forslag for å få fullført sesongen i Premier League. Foto: Owen Humphreys / PA via AP / NTB scanpix

ANNONSE
Annonse