Fotballtoppar hudfletta tyske medium

Det oppsiktsvekkande utbrotet kjem etter at det sigersvande Bayern ikkje har vunne nokon av dei fire siste kampane sine.

- FC Bayern vil ikkje lenger akseptere denne forma for journalistikk, rasa styreformann Rummenigge, som til og med trekte fram eit sitat frå den tyske grunnlova i tiraden sin.

Der heiter det «menneskeverdet skal vere ukrenkeleg».

- Dei tenker openbert ikkje på verdigheit og vanleg folkeskikk lenger, freste Rummenigge.

- Det ser ikkje ut til å vere nokon grenser lenger, særleg for medium og «ekspertar» som tidlegare har spelt i denne klubben, sa han.

- Motbydeleg dekning

Bayerns stjernespelarar, blant dei landslagskeeper Manuel Neuer, har måtta tole skarp kritikk for prestasjonane sine den siste tida.

Rummenigge røpte vidare at Bayern-leiinga har vedteke å ta rettslege skritt mot fleire tyske medium.

- Vi finn oss ikkje i denne forferdelege og nedverdigande mediedekninga. Vi kjem til å verje spelarane våre, trenaren vår og klubben frå i dag av, sa Rummenigge.

Klubbpresident Hoeness følgde opp med å rette skarp kritikk mot enkeltjournalistar og sa at dei ikkje vil «akseptere denne respektlause, motbydelege dekninga».

Bayern München har tapt dei to siste bundesligakampane sine mot høvesvis Borussia Mönchengladbach og laget til Rune Almenning Jarstein, Hertha Berlin. Det er sjeldan kost for storklubben.

Akkurat no er Bayern nummer åtte på tabellen, fire poeng bak ligaleiar Borussia Dortmund. Laurdag møter dei Wolfsburg.

Sjeldan kritikk

Bayern har vunne seks strake seriemeisterskapar og fleire av dei med svært komfortabel margin. Derfor har ikkje klubben fått mykje kritikk dei siste åra.

På den hastig innkalla pressekonferansen fredag tilbakeviste òg sportsdirektør Hasan Salihamidzic at han ikkje skal ha vist hovudtrenar Niko Kovac nok støtte.

- Dei påstandane er respektlause, sa han og la til at ingen i Bayern har vore kritiske til trenaren.

(©NPK)

Bayern-trenar Niko Kovac har måtta tole kritikk. Foto: Tobias Hase/dpa via AP / NTB scanpix