Nordre

Frankrikes ambassadør til Bosnia kalla inn på teppet etter Macron-kommentar

Bosnia har kalla den franske ambassadøren inn på teppet etter at Frankrikes president Emmanuel Macron beskreiv landet som ein tidsinnstilt bombe.

Ambassadør Guillaume Rousson møtte fredag Zeljko Komsic, som er leiar for Bosnias tredelte presidentskap.

Frankrikes utanriksdepartement har stadfesta at ambassadøren vart «bedt om å besøkje det bosniske presidentskapet», men vil ikkje spesifisere kvifor.

I eit intervju med det britiske nyheitsmagasinet The Economist har Macron omtalt Bosnia som «hovudspørsmålet» i Balkan-regionen.

- Den tidsinnstilte bomba som tikkar rett ved sida av Kroatia, og som står overfor problemet med tilbakevendande jihadistar, er Bosnia-Hercegovina, sa Macron i intervjuet.

Ein studie i 2015 frå tryggingsselskapet Soufan Group anslo at det var om lag 300 bosniske jihadistar i Syria og Irak, samanlikna med 1.700 franskmenn.

I N1 blir sitert Bosnias statsminister Denis Zvizdic på at Bosnia «ikkje er ein trussel mot nokon» og at landet har stoppa straumen av stridande til Midtausten.

Macrons intervju skapte overskrifter torsdag av andre årsaker, då han omtalte Nato som «hjernedød» og hevda at USA vender seg vekk frå Europa.

Det førte til sjeldan kritikk frå Tysklands statsminister Angela Merkel, som sa at det er upassande å felle ein så drastisk dom og bruke så drastiske ord om forsvarsalliansen.

(©NPK)

Leiar Zeljko Komsic i det bosniske presidentskapet (høgre) og Frankrikes ambassadør til Bosnia, Guillaume Rousson, møttest fredag. Foto: Det bosniske presidentskapet via AP / NTB scanpix

ANNONSE
Annonse
ANNONSE
Annonse