Friidrett: Ingen norske nominerte til årets utøvar

Ingen norske nominert til årets utøvar i internasjonal friidrett, men veslebror Ingebrigtsen kan likevel sørgje for norsk jubel under utdelinga.

Om knappe 14 dagar skal prisane til årets utøvar delast ut av IAAF (Det internasjonale friidrettsforbundet). På lista over nominerte finn vi ingen norske, verken på herre eller kvinnesida.

På lista over dei nominerte i årets mannlege utøver finn vi Christian Coleman (USA, sprint), Armand Duplantis (Sverige, stavsprang), Eliud Kipchoge (Kenya, langdistanse), Kevin Mayer (Frankrike, tikamp) og Abderrahman Samba (Qatar, hekk).

Dei nominerte på kvinnesida er Dina Asher-Smith (Storbritannia, friidrett), Beatrice Chepkoech (Kenya, hinderløp), Caterine Ibargüen (Colombia, tresteg og høgde), Shaunae Miller-Uibo (Bahamas, sprint) og Nafissatou Thiam (Belgia, mangekamp).

Men Jakob Ingebrigtsen er på lista over moglege vinnarar av prisen som årets unge stjerneskot. 18-åringen tok to EM-gull på 24 timar i Berlin då han vann 1500 og 5000 meter.

Dei andre nominerte i denne kategorien er Selemon Barega (Etiopia, langdistanseløpar), Jordan Diaz (Cuba, tresteg), Armand Duplantis (Sverige, stavsprang) og Rhonex Kipruto (Kenya, langdistanseløpar).

Ingebrigtsen vann tilsvarande utmerking i regi av Det europeiske friidrettsforbundet.

Tildelinga av IAAF-prisen skjer på ein galla i Monte Carlo 4. desember.

(©NPK)

Jakob Ingebrigtsen kan vinne prisen som årets unge stjerneskot under IAAFs galla om to veker. På bildet har han nettopp vunne finalen på 5000 meteren i friidretts-EM på Olympiastadion i Berlin i sommar.
Foto: Fredrik Hagen / NTB scanpix

Annonse
Annonse