Frode Berg: – Glad for å vere heime
Frode Berg er tilbake i Kirkenes, og måndag heldt han pressekonferanse for dei lokale media. Ifølgje han har mottakinga vore svært god.
– Eg er utruleg glad for å vere tilbake der eg høyrer heime, sa Berg til det frammøtte pressekorpset.
Berg heldt pressekonferansen for å gi lokale medium moglegheita til å stille spørsmål.
Sidan han landa søndag, har Berg treft familien og lokalbefolkninga. Folk har tatt han svært godt imot:
– Eg merkar det berre eg går i gatene i Oslo sentrum. Fleire har stoppa meg og gitt meg klemmer. Det er berre positivt, ikkje noko negativt, sa han.
Kjenner seg lurt
Berg har sagt at han vil prate med lokalbefolkninga og forklare. Berg gjentok måndag at han kjenner seg lurt.
– Det var ein person eg stolte frykteleg på. Eg kjente han og visste kva han stod for. Han jobba i E-tenesta og spurde om eg kunne gjere han ei teneste neste gong eg drog til Russland. Hadde eg vorte fortald den gongen kva det gjekk ut på, hadde eg sjølvsagt ikkje reist for dei, seier Berg til NTB.
Berg vart brukt som kurer av E-tenesta, og han peikar på at han aldri har vore spion, sjølv om det var det han vart dømd for.
– Eg har aldri fått opplysningar eller treft andre personar i det heile. Eg har berre hatt ei adresse eg har sendt pengar til.
Han fortalde vidare at det er heilt vanleg at russarar ønsker pengar i kontantar når ein samarbeider over grensa.
Meiner E-tenesta må lære
Berg seier han skal ut i gatene og snakke med folket for å finne ut korleis saka har påverka lokalsamfunnet.
– Eg har nok trua på at vi skal komme styrkte ut av det, og har lært noko av det. Etter kvart kan det nok vere behov for ei storreingjering her med tanke på folk-til-folk-samarbeid, sa Berg til NTB.
Berg seier E-tenesta må lære av saka.
– Meininga mi er at det er fullstendig feil å bruke folk frå lokalmiljøet, spesielt her i Sør-Varanger, det er rett og slett ein tabbe dei har gjort. Det er berre eit under at ikkje nokon andre har vorte arresterte tidlegare, seier Berg.
Berg vart 15. november lauslaten etter å ha vorte dømd for spionasje og halde til nesten to år i russisk fengsel.
(©NPK)
Frode Berg heldt pressekonferanse dagen etter at han kom heim til Kirkenes.
Foto: Ørn E. Borgen / NTB scanpix
