Froome fekk sigeren i Vuelta a España åtte år etter
Den britiske syklisten Chris Froome er offisielt tildelt sigeren i etapperittet Vuelta a España i 2011, melder BBC.
For åtte år sidan gjekk spanske Juan José Cobo til topps i det spanske storrittet føre Froome. Spanjolen har seinare testa positivt for doping, og først no har Det internasjonale sykleforbundet (UCI) formelt fråtatt han sigeren.
UCI fann avvik i Cobos biologiske pass i perioden 2009-11. 38 år gamle Cobo som la opp i 2014, er pålagt tre års utestenging med tilbakeverkande kraft.
Cobo hadde ein månad på seg til å anke UCIs avgjerd til Den internasjonale valdgiftsretten (CAS), men har han ikkje nytta seg av den moglegheita. Dermed er dommen rettskraftig.
Med sigeren har Froome, som ikkje deltar i årets Tour de France på grunn av den stygge velten under trening tidlegare i sommar, sju sigrar i dei tre store ritta, Giro d'Italia, Tour de France og Vuelta a España.
Han blir dermed òg ståande som den første briten som vinn eitt av dei store ritta og ikkje Bradley Wiggins som vann Tour de France i 2012.
(©NPK)
Briten Chris Froome har formelt blitt vinnar av Vuelta a España i 2011. Foto: Heiko Junge / NTB scanpix
