Gazzetta: Solbakken kan bli Mourinhos ekstra våpen

Vinnarmålet mot Verona søndag kan få fart på Roma-karrieren til Ola Solbakken etter ein trøblete start i den italienske hovudstaden.

Det skriv den italienske avisa Gazzetta dello Sport.

Solbakken har slite med speletid i den italienske storklubben etter overgangen på nyåret, men fekk sin første kamp frå start i møtet med Hellas Verona søndag.

Eitt minutt på overtid i første omgang sende han Roma i føringa etter pasning frå Leonardo Spinazzola. Fleire mål vart det ikkje i oppgjeret, og Solbakken vart matchvinnar i sin første kamp frå start for klubben.

Prestasjonen gjennom dei 70 minutta Solbakken var på banen, gav han 6,5 på børsen. Avisa meiner at nordmannen gjorde fleire feil, men at målet «heilaga» prestasjonen.

Leonardo Spinazzola, som serverte den målgivande pasningen til nordmannen, vart beste på banen med 7 på børsen.

Gazzetta skriv at Solbakken tok steget frå «eit mysterium» til å bli avgjerande i oppgjeret mot Verona. Avisa skriv vidare at nordmannen sende eit viktig signal til trenar José Mourinho om at han fortener meir speletid.

Det var nemleg på ingen måte gitt at Solbakken skulle starte kampen.

Tidlegare denne månaden gjekk Mourinho ut i media og kritiserte Solbakkens taktikkforståing.

– Solbakken forstår ikkje taktikken vår på same måte som resten av gutane. Han veit ikkje forskjellen mellom 5-3-2 og 3-4-1-2 (fotballformasjonar). Han forstår ikkje kva høgt press er, sa Mourinho på ein pressekonferanse, ifølgje Football Italia.

Roma ligg på 3.-plass i Serie A med like mange poeng som Milan. Napoli toppar tabellen med 18 poeng. Torsdag ventar neste oppgåve for Solbakken og co. når Salzburg kjem på besøk i europaligaen.

(©NPK)

Ola Solbakken kan ha fått fart på karrieren i Roma. Foto: Andrew Medichini / AP Photo / NTB

Annonse
Annonse