Geir Hønneland blir ny generalsekretær i Helsingforskomiteen

Det opplyser Helsingforskomiteen på nettsidene sine.

Hønneland er statsvitar og tidlegare russlandsforskar ved Fridtjof Nansens Institutt, der han òg sat nærare 15 år i leiargruppa til instituttet, dei siste fem åra som direktør. Akkurat no er han tilknytta Norsk utanrikspolitisk institutt (NUPI).

– Eg ser fram til å få brukt leiingserfaringa mi frå både forsking og organisasjonsliv, og dessutan den faglege bakgrunnen min frå det postsovjetiske området. Og eg ser fram til å jobbe med menneskerettar og demokrati, som eg brenn for, seier Hønneland.

Hønneland tek over etter Bjørn Engesland, som i september gjekk av etter 25 år som generalsekretær.

Helsingforskomiteen er ein ikkje-statleg ideell organisasjon som arbeider for at menneskerettane skal respekterast og omsetjast i praktisk handling.

(©NPK)