Greenpeace-skip sendt til Bangladesh for opphogging
Greenpeace er imot opphogging av skip på strender i Søraust-Asia. Likevel har miljøorganisasjonen godkjent at eitt av skipa deira er send dit for opphogging.
- Dette er sjukt pinleg, seier leiar Truls Gulowsen i Greenpeace til Dagens Næringsliv.
Store delar av shippingnæringa vel å sende skipa til opphogging på usertifiserte anlegg eller strender. Slik opphogging går òg under namnet «beaching».
Gulowsen forklarer at skipet Rainbow Warrior II vart gitt til organisasjonen Friendship i 2011 med klausul om at opphogginga skulle skje i samråd med Greenpeace. Organisasjonen presenterte planane sine om opphogging etter avtalen. Miljøorganisasjonen godkjende så desse med ein feil.
- Opphogginga var resultat av ein stor intern feil, og betyr på ingen måte at Greenpeace anerkjenner «beaching» og opphogging på slike strender som akseptabel metode for nokon skip.
Skipet har tidlegare delteke i blokade mot russiske kvalfangarar, protestert mot franske atomvåpen og stoppa skip som transporterer kol og palmeolje. No er skipet på ei strand i Chittagong i Bangladesh.
Verfta her har vorte skulda for brei bruk av barnearbeid, elendige arbeidsforhold og miljøskadelege utslepp, skriv avisa.
(©NPK)
Tidlegare Greenpeace-skip er sendt til Bangladesh for opphogging, sjølv om organisasjonen er uttalt motstandar mot det. Leiar Truls Gulowsen i Greenpeace kallar hendinga «sjukt pinleg».
Foto: Cornelius Poppe / NTB scanpix
