Guatemalas president koronasmitta

Guatemalas president Alejandro Giammattei opplyser at han har testa positivt for covid-19.

64 år gamle Giammattei seier til ein radiostasjon fredag at han føler seg i fin form.

Kunngjeringa frå presidenten, som har multippel sklerose, kom same dagen som landet gjenopna grensene sine etter ei seks månader lang stenging.

Utlendingar som vil inn i landet, må vise fram ein negativ PCR-test teken maks 72 timar før innreise.

Statsborgarar som vender heim, og barn under ti år blir ikkje kravde nokon test.

Guatemala har registrert rundt 83.600 smittetilfelle og drygt 3.000 koronarelaterte dødsfall. Landet har rundt 17 millionar innbyggjarar.

(©NPK)

Guatemalas president Alejandro Giammattei under feiringa av uavhengigheitsdagen i Guatemala by 14. september. Foto: Moises Castillo / AP / NTB

Annonse
Annonse