Gut teken av flaum i Italia funnen død etter åtte dagar

Likte av ein åtte år gammal gut er funne åtte dagar etter at ein storflaum ramma den italienske regionen Marche søraust i Italia.

Politiet fann den døde guten på eit jorde etter at ein forbipasserande melde frå, skriv fleire italienske medium. Liket er no frakta til eit sjukehus i byen Ancona for obduksjon.

Åtteåringen vart teken av flaum då han var på veg ut av bilen med mor si sist torsdag. Store delar av Marche vart ramma av flaum førre veke som følgje av store nedbørsmengder på kort tid.

Så langt er tolv personar stadfesta omkomne. Ei kvinne er framleis sakna.

(©NPK)

Annonse
Annonse