Handball: NM-finalar for fulle hus
Alle billettane til NM-finalane i handball er selde. Dermed blir oppgjera Vipers - Storhamar og Elverum - Halden spelt framfor nesten 7.000 tilskodarar.
Alle 6.740 billettar til finalane i Oslo Spektrum 29. desember er selde, opplyser Norges Håndballforbund onsdag.
- At ein arena på denne storleiken blir utselt sjølv i romjula, stadfestar kva posisjon handballen har hos det norske publikummet, seier kommersiell sjef i Norges Håndballforbund, Jan-Erik Aalbu.
Finalekampane i Oslo Spektrum opnar med jenter 20-finalen mellom Byåsen og Sola, før gutar 20-finalen mellom Bækkelaget og Nærbø.
Deretter er det seniorfinalar, der oppgjeret Vipers Kristiansand-Storhamar (kvinner) blir avløyst av oppgjeret mellom Elverum og Halden (herrar).
(©NPK)
Vipers' Marta Tomas og Henny Ella Reistad (25) skal spele NM-finale for fulle tribunar. Foto: Tor Erik Schrøder / NTB scanpix
