Handball: Riegelhuth Koren legg opp

Handballveteranen Linn-Kristin Riegelhuth Koren (34) har bestemt seg for å avslutte karrieren etter 16 sesongar i Larvik.

Handballveteranen Linn-Kristin Riegelhuth Koren (34) har bestemt seg for å avslutte karrieren etter 16 sesongar i Larvik.

«Linka» var i ei årrekkje ein av dei beste handballspelarane i verda. I Larvik er ho toppskårar gjennom tidene med sine 3407 mål på 591 kampar.

- Alle gode ting tek slutt ein dag, og eg kjenner at dette er rett tidspunkt for meg å starte noko nytt. Handball har vore ein stor del av livet mitt, men når ei dør blir stengd så opnar det seg andre med nye moglegheiter, seier Linn-Kristin Riegelhuth Koren.

34-åringen vart kåra til den beste handballspelaren i verda i 2008 av Det internasjonale handballforbundet (IHF). I 2012 var ho ein av tre spelarar som var regjerande meister i alt samtidig (OL, VM, EM, meisterligaen, serien, cup og sluttspel).

I løpet av 15 år var ho med å ta åtte gull, to sølv og to bronse for Noreg. Ho vart òg teken ut på stjernelaget under EM 2008 og VM 2009. På landslaget scora ho 971 mål på 279 kampar før det vart slutt i 2017. Det er nest flest mål gjennom tidene.

(©NPK)

Larviks Linn-Kristin Riegelhuth Koren (34) legg opp etter 16 år på topp. Foto: Audun Braastad / NTB scanpix

ANNONSE
Annonse