Hegerberg rangert som EMs beste spelar av svensk storavis
Ada Hegerberg toppar svenske Aftonbladets liste over dei 49 beste spelarane i årets fotball-EM for kvinner. Noreg har to blant topp tre.
– Eitt av dei mest etterlengta comebacka i meisterskapen. Etter å ha sagt nei til landslaget i 2017, er Ada Hegerberg tilbake. Den norske spissen har ein tung skadeperiode bak seg, men har gjennom våren vist at ho framleis er ei verdsstjerne. Ho er den leiande målscoraren i Champions League-historia og fekk i 2018 Ballon d'Or som første kvinne. Ho tok sitt Lyon til endå ein Champions League-tittel og håpar no å hauste suksess med landslaget, er Aftonbladets dom av den norske superstjerna.
Og vi skal ikkje lenger ned enn til 3.-plass for å finne neste nordmann. Caroline Graham Hansen har imponert stort i Barcelona, og ifølgje den svenske avisa er det berre nederlandske Vivianne Miedema som skil dei norske stjernene.
Den spanske Barcelona-stjerna Alexia Putellas vart på førehand sett på som den beste spelaren i EM av fleire store medium, men ho måtte melde forfall tysdag etter at ho sleit korsbandet på trening. 28-åringen er derfor ikkje med på Aftonbladets liste.
Chelsea-spelar Guro Reiten og Barcelonas Ingrid Syrstad Engen har også fått plass på lista på høvesvis 18.- og 40-.plass.
(©NPK)
Svenske Aftonbladet har rangert dei 49 beste spelarane til fotball-EM for kvinner i sommar. Ada Hegerberg toppar lista.
Foto: Terje Pedersen / NTB
