Heile tre av ti Ap-veljarar ønskjer regjering utan SV
I ei ny meiningsmåling svarer 31 prosent av Arbeidarpartiets veljarar at dei ville føretrekt ei regjering utan SV – og berre med Ap og Sp.
Rett nok er det eit fleirtal på 53 prosent som er for ei trepartiregjering med både Ap, SV og Sp, slik som AP-leiinga ønskjer, men eit stort mindretal er altså samd med Sp-leiar Trygve Slagsvold Vedum, skriv Aftenposten.
– Dette er ikkje overraskande. Mange ønskjer ein praktisk og jordnær politikk som utviklar heile landet, og ein skatte- og avgiftspolitikk som ikkje rammar vanlege folk for hardt, seier Vedum i ein kommentar til avisa.
Partisekretær Kjersti Stenseng ønskjer ikkje å kommentere det store mindretalet, men understrekar i ein SMS til avisa at Ap berre har éin plan: ei raudgrøn trepartiregjering.
Vedum sjølv har heile tida sagt at han ikkje ønskjer å gå inn i regjering med SV, og at han føretrekkjer eit alternativ med berre Ap og Sp. Men blant hans eigne veljarar er det 34 prosent som vil ha med SV.
Heile 95 prosent av SVs veljarar svarer at dei føretrekkjer ei regjering med både Ap, Sp og SV.
Meiningsmålinga er utført av Norstat for Aftenposten.
(©NPK)
Eit stort mindretal på 31 prosent av Aps veljarar ønskjer ei regjering berre med Sp og Ap, og utan SV. Det er likevel størst fleirtal for trepartiregjeringa, med 53 prosent.
Foto: Terje Pedersen / NTB
