Henrik Kristoffersen vann VM-gull i storslalåm
Henrik Kristoffersen vann gull i storslalåm under alpin-VM i Åre fredag. Han slo Marcel Hirscher for første gong i vinter og viste favoritten til sølvplass.
Alexis Pinturault frå Frankrike leia etter første omgang, men han måtte nøye seg med bronse. Hirscher vart slått med 0,20 sekund og Pinturault med 0,42.
Kristoffersen var aller første utøvar i aksjon i rennet, og han noterte ei tid som heldt til tredjeplass etter første omgang, 18 hundredelar bak Pinturault og åtte bak tittelforsvarar Hirscher.
Som tredje siste startande i finaleomgangen leverte nordmannen offensiv og god køyring og køyrde i mål med ei leiing på 0,92 sekund. Allereie då var han sikra medalje, så fekk dei to sist startande avgjere kva for ein valør det vart.
Marcel Hirscher tapte forspranget sitt på åtte hundredelar innan andre mellomtid, og i mål var han to tidelar bak. Heller ikkje Pinturault hadde nokon sjanse mot Kristoffersens tid, og dermed vart det full norsk jubel i målområdet.
(©NPK)
Henrik Kristoffersen i aksjon i storslalåmrennet i alpin-VM fredag. Foto: Cornelius Poppe / NTB scanpix
