Hopp: Austerrikarar og tyskarar ladar opp på Lillehammer

Både dei austerrikske og tyske hopparane har lagt treningsleiren sin til Lillehammer etter at verdscuprennet kommande helg i tyske Titisee-Neustadt vart avlyst.

Det sterke tyske hopplandslaget har valt Lysgårdsbakken som base når dei fleste bakkane elles i Sentral-Europa er utan snø. Også det tyske kombinertlandslaget skal trene på Lillehammer denne veka.

Austerrikarane under landslagssjef Andreas Felder har ikkje hatt nokon god start på hoppsesongen. Stefan Krafts 5.-plass frå Nizjnij Tagil i helga er beste plassering. Kraft vart dessutan best av dei austerrikske hopparane med 10.-plass i eitt av renna i finske Ruka.

Mens lagkameratane trenar på norsk snø før rennet til neste helg i sveitsiske Engelberg, har veteranen Gregor Schlierenzauer valt å ta ein pause frå hoppinga for å vere klar til den tysk-austerrikske hoppveka som startar i Oberstdorf 29. desember.

Det er assistenttrenar Florian Liegl som skal vere saman med hopparen som har vunne 53 verdscupsigrar i karrieren.

Schlierenzauers siste sigar kom i Lysgårdsbakken i 6. desember i 2014, men 28-åringen har slite med skadar dei siste sesongane.

(©NPK)

Gregor Schlierenzauer tar konkurransepause fram til den tysk-austerrikske hoppveka. Resten av det austerrikske laget trenar for tida på Lillehammer. Foto: Geir Olsen / NTB scanpix

ANNONSE
Annonse