Politiet ransaka Tour de France-lag
Sykkellaget Bahrain Victorious fekk hotellet dei bur på i København ransaka av dansk politi dagen før Tour de France-starten.
Klubben stadfestar at politiet har undersøkt utstyr, støtteapparat og rom på hotellet Scandic Glostrup i København.
I ei pressemelding skriv klubben at undersøkinga varte i rundt to timar og at ingenting vart teke frå laget.
Årets Tour de France-ritt startar i den danske hovudstaden fredag.
Fleire ryttarar og tilsette på Bahrain Victorious vart også undersøkte i samband med avreise til rittet måndag, stadfesta leiinga til laget. Det var ei fortsetjing på ei dopingetterforsking frå Tour de France i fjor.
Leiinga i hotellet stadfesta overfor Ekstra Bladet at politiet var i gang med undersøkingar torsdag morgon.
– Politiet kom litt før klokka 6 og er i gang med å etterforske, sa direktør Jeroen Bishop til Ekstra Bladet.
Visepolitiinspektør Lars Karlsen stadfesta overfor nyheitsbyrået Ritzau at dei ransakar hotellet, men dei ville torsdag morgon ikkje stadfeste om det har samanheng med Bahrain-laget.
– Det handlar om ei aktuell sak som ikkje utgjer nokon fare for borgarane, seier han.
Hotellet ligg eigentleg ikkje innanfor distriktet til København-politiet, men Karlsen opplyser at det er dei som leier etterforskinga.
(©NPK)
Sykkellaget Bahrain Victorious får hotellet dei bur på ransaka torsdag morgon. Foto: Daniel Cole / AP / NTB