Nordre

Huawei tilbyr Noreg avtale som forbyr spionasje

Den kinesiske teknologigiganten Huawei tilbyr Noreg ein «no-spy-agreement», der dei lovar at Kina ikkje skal kunne spionere på norske mobilkundar i 5G-nettet.

- Kinesiske styresmakter vil aldri be oss spionere eller ha bakdører for dei inn i nettet, seier James Chen til NRK.

Han er visekonsernsjef for Huaweis verksemd i Sentral-, Aust- og Nord-Europa.

Chen fortel at han er overtydd om at Noreg og Kina vil løyse utfordringane knytt til den framtidige rolla til selskapet i telenettet.

- Vi vil inngå ein «no-spy-agreement», der vi skriv under på at Huawei aldri vil gi informasjon til nokon styresmakter, heller ikkje Kina, seier Chen til kanalen.

I Noreg har Politiets tryggingsteneste (PST) fleire gonger uttalt at det vil vere problematisk viss Huawei blir trekt inn i utbygginga av det norske 5G-nettet. Ifølgje tidlegare PST-sjef Benedicte Bjørnland er vegen kort frå selskapet til det kinesiske regimet.

Sjølv om Huawei tilbyr Noreg ein såkalla «no-spy-agreement», er ikkje det nok, ifølgje PST. I ei tekstmelding til NRK skriv kommunikasjonssjef Martin Bernsen at dei har nøyaktig same vurderinga som tidlegare.

Huawei har vorte utestengt frå 5G-utbygging i fleire land på grunn av frykt for det tette bandet selskapet har til kinesiske styresmakter. USA mistenker statsspionasje og har bedt NATO-allierte om ikkje å bruke teknologien til selskapet. Seinast onsdag denne veka signerte USAs president Donald Trump ei fråsegn om ein «nasjonal nødssituasjon» som forbyr amerikanske selskap å bruke utanlandsk utstyr som «utgjer ein uakseptabel risiko».

(©NPK)

Huawei forsikrar at Kina ikkje skal få spionere eller sabotere det norske 5G-nettet. Foto: Heiko Junge / NTB scanpix

ANNONSE
Annonse