Innreiserestriksjonane blir vidareførte fram til 13. mai
Regjeringa vidarefører dei strenge innreiserestriksjonane fram til 13. mai.
Tiltaka blir vidareførte inntil vidare, men i første omgang til og med 12. mai, opplyser regjeringa.
– Vi står framleis i ein alvorleg smittesituasjon. Det er derfor nødvendig å forlengje dei strenge innreiserestriksjonane. Vi håpar alle at vi held fram med å sjå ei nedovergåande kurve i smittesituasjonen, og vi vurderer fortløpande lettar i innreiserestriksjonane, seier justis- og beredskapsminister Monica Mæland (H).
Mæland seier at gjenopninga vil skje gradvis og kontrollert i tråd med gjenopningsplanen.
Noreg stengde i praksis grensene 29. januar, men med visse unntak. Alle som kjem til Noreg frå det som blir rekna som unødvendige utanlandsreiser, må på karantenehotell for eiga rekning i minst sju dagar.
Justis- og beredskapsminister Monica Mæland seier det er nødvendig å forlengje innreiserestriksjonane. Foto: Stian Lysberg Solum / NTB / NPK