Irakiske tenestemenn: Åtte demonstrantar drepne i Bagdad
Åtte demonstrantar er drepne og minst nitti er skadde i nye kraftige samanstøytar i sentrum av Bagdad, opplyser irakiske tenestemenn.
Tre demonstrantar vart drepne i Rasheed Street, som er ei av hovudgatene i den irakiske hovudstaden, då det seint torsdag ettermiddag var samanstøytar mellom tryggingsstyrkar og demonstrantar, ifølgje tryggingskjelder.
Tryggingsstyrkane skal ha brukt mellom anna tåregass og lydbomber.
Ein av demonstrantane vart drepen då tryggingsstyrkane skaut med skarp ammunisjon for å få demonstrantar bort frå Ahrar-brua, medan to døydde då politiet brukte tåregassgranatar, opplyser anonyme kjelder i helsevesenet og statsapparatet.
Tidlegare torsdag vart fire demonstrantar drepne i nærleiken av Ahrar-brua. Seinare på dagen vart ein person drepen då politiet kasta lydbomber mot demonstrantar på Sinak-brua. Dermed er totalt åtte demonstrantar drepne i samanstøytane i Iraks hovudstad torsdag.
I ei separat hending vart òg ein politibetjent drepen og seks andre skadde. Det skjedde då ei improvisert eksplosiv innretning (IED) eksploderte nordaust i byen, opplyser irakiske tenestemenn.
Tåregassgranatane som tryggingsstyrkane i Irak har brukt mot demonstrantane, er anslått å vere ti gonger så kraftige som vanlege tåregassgranatar. Over 330 personar blir anslått å ha mista livet sidan demonstrasjonane starta 1. oktober.
Demonstrantane krev mellom anna at det blir rydda opp i den omfattande korrupsjonen og høge arbeidsløysa i landet.
(©NPK)
Irakiske sikkerheitsstyrkar kontrollerer ei bru som leier over til den grøne sona, som er der blant anna regjeringsbygningane ligg. Foto: Hadi Mizban, AP / NTB scanpix
