Nordre

Ire får ansvar for EUs handelsavtale med Storbritannia etter brexit

Den irske brexitkritikaren Phil Hogan blir EUs handelskommissær. Han blir dermed den britiske motparten når ein framtidig handelsavtale skal på plass.

Hogan har dei siste fem åra vore EU-kommissær for landbruk, eit viktig felt med eit stort budsjett. I Ursula von der Leyens kommisjon skal han ha ansvar for handel, eit anna tungt verv.

Ei av oppgåvene som ventar i den nye jobben, er å forhandle fram ein handelsavtale med eit utmeldt Storbritannia.

- Kommissær Hogan vil sjølvsagt arbeide for Europa som heilskap, men det er heilt klart ein fordel å ha ein ire i denne posisjonen i den viktige perioden som ligg føre oss, sa Irlands statsminister Leo Varadkar då utnemninga vart kjent.

Kritisk

Irland er det EU-landet som kjem til å merke den britiske utmeldinga mest, og nettopp grensa mot Irland har vore det vanskelegaste spørsmålet i brexitforhandlingane. Med tanke på den kommande kommissæren sine tidlegare utsegner, er det liten grunn til å tru at han kjem til å gi ved dørene i forhandlingane som ventar.

Hogan har dei siste åra vore svært kritisk til brexitforkjemparane. Han har skulda dei for å fare med løgn og har tidlegare kalla brexit ein utopi som berre eksisterer i dei konservative sitt valprogram. Nyleg langa han ut mot den «ikkje valde» statsministeren Boris Johnsons handtering av utmeldinga frå EU.

Trump og Brasil

I den nye jobben får Hogan òg andre kompliserte oppgåver i fanget. Han seier mellom anna at EU vil prøve å få USAs president Donald Trump til å gi opp sin «dumdristige» handelspolitikk.

- Trump har vist at han føretrekker handelskrig framfor handelsavtalar. Vi vil gjere det vi kan for å få han til å innsjå feila sine, og forhåpentlegvis vil han kutte ut noko av den åtferda vi har sett overfor Kina og når han omtaler EU som ein tryggingsrisiko, seier Hogan til den irske kringkastaren RTE.

Hogans portefølje inkluderer òg den nye handelsavtalen med det søramerikanske handelsforbundet Mercosur. Fleire EU-land, inkludert Hogans heimland, har trua med å ikkje ratifisere avtalen med mindre Brasils president Jair Bolsonaro gjer meir for å verne regnskogen i Amazonas.

Til liks med resten av kommisjonen som vart presentert tysdag, skal Hogan til utspørjing i EU-parlamentet og må bli godkjent der før han kan ta fatt på dei nye oppgåvene sine 1. november.

(©NPK)

Phil Hogan går frå eitt tungt verv til eit anna i EU-kommisjonen når han overtar ansvaret for unionens handel med resten av verda, inkludert eit framtidig utmeldt Storbritannia. Arkivfoto: Virginia Mayo / AP / NTB scanpix

ANNONSE
Annonse
ANNONSE
Annonse