Nordre

Ivar Koteng attvald som RBKs styreleiar etter benkeforslag

Ivar Koteng vart torsdag attvald som styreleiar i Rosenborg på årsmøtet i klubben. Han slo Ståle Gjersvold, som var foreslått av valkomiteen.

Koteng, som har hatt vervet sidan 2012, vart innstilt etter eit benkeforslag. Han slo Gjersvold med 331 mot 244 stemmer. 17 stemmer var blanke.

– Det er hyggeleg å vinne når eg stiller opp, sa Koteng til Adresseavisen.

– Det var ein grei debatt. Litt kjedeleg kanskje. Det var i alle fall mange som møtte opp, sa Gjersvold. Han opplyste at han kanskje ville stille på nytt ved eit seinare høve.

Bård Benum, Vegard Heggem og Synnøve Farstad går ut av styret. Inn kjem tidlegare generalsekretær i Norges Fotballforbund Karen Espelund, tidlegare landslagstrenar i langrenn Svein Tore Samdal og den tidlegare RBK-spelaren Fredrik Winsnes. Det vart stilte benkeforslag på Moren Loktu, men han nådde ikkje opp i avstemminga.

Dei tre førstnemnde var forslaget frå valkomiteen. Winsnes rykker opp frå vervet sitt som varamedlem. Frode Halvorsen vart vald inn som nytt varamedlem.

Resten av styremedlemmene, Leif Inge Nordhammer, Rune Bratseth og Marit Collin, var ikkje på val.

NRK-profilen Tore Strømøy freista å komme i posisjon til å bli valt, men var ikkje valbar sidan han ikkje har vore medlem i klubben lenge nok.

Det var 592 stemmeføre til stades på årsmøtet

(©NPK)

Sitjande styreleiar Ivar Koteng vart attvald på årsmøtet til Rosenborg torsdag kveld. Foto: Ole Martin Wold / NTB scanpix

ANNONSE
Annonse