Nordre

Thingnes Bø vann på bursdagen til sonen – Lægreid sørgde for dobbelt norsk

Johannes Thingnes Bø leverte varene på sprinten i Oberhof og vann det 51. verdscuprennet sitt. Sturla Holm Lægreid sørgde for dobbelt norsk.

Fem dagar etter at Thingnes Bø tok den 50. verdscupsigeren sin, vart det ein ny triumf for 27-åringen. Thingnes Bø skaut to fulle hus og gjekk godt i sporet.

På sisterunden auka han til konkurrentane, men det kosta krefter. Han vart liggjande lenge i målområdet og var svært sliten etter at han hadde passert målstreken, 12,4 sekund før Sturla Holm Lægreid.

Sigeren kom på eittårsdagen til sonen Gustav.

– Det smaker veldig godt. Eg måtte jobbe for det, og eg var heilt ferdig då eg kom i mål, sa vinnaren og heldt fram:

– Det var det store ønsket, det å vinne på bursdagen til Gustav. Eg visste at det kom til å bli vanskeleg, men det er det eg kan bidra med. Eg har hatt ein kjempegod dag, og han fekk smake muffinskake i dag. Han er nok endå meir fornøgd enn meg! Sjølv om han berre er eitt år, er han ei legende..

Nummer 51

Sigeren er den 51. i verdscupen for Thingnes Bø, inkludert VM og OL. Den første kom på sprinten i franske Annecy i desember 2013.

Med startnummer 22, som første nordmann ut, skaut Sturla Holm Lægreid fullt hus på både liggjande og ståande. I tillegg gjekk ungguten særs godt i sporet. Han vart nummer to.

– Det gjekk overraskande bra på standplass, så det er eg veldig fornøgd med. Eg prøver å skyte berre gode skot. I dag klarte eg å ha ti gode skot, det er eg veldig fornøgd med, seier 23-åringen til NRK.

Tysk 3.-plass

Tyske Arnd Peiffer, også han med to fulle hus, vart nummer tre, 27,9 sekund bak Thingnes Bø.

Johannes Dale skaut fullt hus på liggjande og trefte dei fire første på ståande før han bomma på det siste skotet. Dermed vart det strafferunde og ein femteplass.

– Det er utruleg surt med det siste skotet. Det er utruleg dårleg av meg. Eg blir for utolmodig og uroleg. Det er ein tullefeil, seier Dale.

Tarjei Bø fekk ein bom og vart nummer 13, medan Vetle Sjåstad Christiansen måtte i strafferunden etter ein bom på liggjande skyting. Han enda på 16.-plass, litt over minuttet bak Thingnes Bø.

Erlend Bjøntegaard leverte feilfritt på standplass, men sleit i sporet. Han vart nummer 20.

(©NPK)

Johannes Thingnes Bø vann sprinten i Oberhof. Han var svært sliten då han passerte målstreken. Foto: Matthias Schrader / AP / NTB

Johannes Dale enda på 5.-plass, medan Arnd Peiffer blei nummer tre. Foto: Matthias Schrader / AP / NTB

ANNONSE
Annonse