Nordre

Johannes Thingnes Bø og Marte Olsbu Røiseland tok VM-gull i single blanda stafett

Johannes Thingnes Bø og Marte Olsbu Røiseland sikra VM-gull for Noreg då single blanda stafett for første gong var på programmet i ein meisterskap i skiskyting.

Olsbu Røiseland gjekk Noreg opp i leiinga på den nest siste etappen, og Thingnes Bø avgjorde gullduellen mot Italia og Sverige med ti treff på ankeretappen.

Nordmannen paraderte inn til gull. Italia tok sølv og Sverige bronse.

Olsbu Røiseland trong eitt ekstraskot på begge skytingane på den første etappen. Etter den første skytinga var ho på sjetteplass, 3,5 sekund bak leiaren. Etter den neste var ho på åttande, 12,8 sekund bak.

Italia veksla først, men Johannes Thingnes Bø sette fart i sporet og kom inn til første skyting med tetgruppa. Der trefte han med alle fem skota og gjekk ut på andreplass, 2,9 sekund bak italienaren Lukas Hofer.

På den neste skytinga vart det verre. Der bomma yngstebror Bø tre gonger og måtte bruke alle tre ekstraskota for å unngå strafferunde. Han gjekk ut på sjetteplass, 20,5 sekund bak Ukraina, som hadde overtatt leiinga etter å ha treft med alle dei 20 første skota sine.

Olsbu Røiseland kneip nokre sekund i sporet og nokre til på den første skytinga på sisteetappen sin, sjølv om ho igjen måtte bruke eit ekstraskot. Ut frå skytinga var ho 14,2 sekund bak Italia, som var tilbake i leiinga ved Dorothea Wierer.

Ho åt opp halve forspranget inn mot den ståande skytinga og plaffa ned alle fem blinkane, slik at ho gjekk ut som førstemann. Olsbu Røiseland sende Thingnes Bø ut på ankeretappen med 0,4 sekunds forsprang på Italia og 2,5 sekund på Sverige.

Dei tre laga kom samla inn til liggande skyting, men Thingnes Bø skaut raskast og trefte med alle fem skota. Hofer var òg god og gjekk ut 1,8 sekund bak, medan Sebastian Samuelsson bomma ein gong og gjekk ut ni sekund bak.

På den ståande skytinga trefte Thingnes Bø igjen fem gonger. Hofer matcha han treff for treff på dei to første skota, men bomma og måtte bruke eit ekstraskot. Dermed gjekk han ut åtte sekund bak, og det kunne han ikkje ta igjen mot den beste skiskyttaren i verda.

Samuelsson måtte òg bruke eit ekstraskot og gjekk ut 15,7 sekund bak nordmannen.

(©NPK)

Johannes Thingnes Bø og Marte Olsbu Røiseland gjekk Noreg inn til VM-gull i single blanda stafett torsdag. Foto: Lise Åserud / NTB scanpix

ANNONSE
Annonse
ANNONSE
Annonse