Jubeldag på Oslo Børs
Hovudindeksen på Oslo Børs auka fredag med heile 1,5 prosent til 865,5 poeng. Dei siste sju dagane har veksten vore på 4 prosent.
Så langt i år er oppgangen på Oslo Børs på nesten 9 prosent.
Det vart omsett aksjar og eigenkapitalbevis for 4,2 milliardar kroner fordelt på 112.000 handlar fredag.
Alle dei mest omsette selskapa, med unntak av Norwegian, steig i verdi. Equinor toppa lista med ei omsetning på 663 millionar kroner og enda med ein oppgang på 2,3 prosent til 200,30 kroner. DNB enda på andreplass og vart omsett for 362 millionar kroner. Kursen steig 1,2 prosent til 162,8 kroner gjennom dagen.
Vinnaren blant dei mest omsette på hovudindeksen vart AF Gruppen som auka 5,2 prosent.
Taparen fredag vart Norwegian som fall 2,4 prosent. Dei siste tolv månadene er børsverdien på flyselskapet halvert.
På dei leiande børsane i Europa var bilde òg positivt. FTSE 100 i London steig 0,8 prosent. DAX 30 i Frankfurt steig 1,9 prosent, mens CAC 40 auka 2 prosent. I USA stig Dow Jones 1,2 prosent etter opning fredag og Nasdaq er opp 0,3 prosent.
Då Oslo Børs stengde, kosta eit fat nordsjøolje 65,6 dollar på spotmarknaden, ein vekst på halvannan dollar sidan torsdag ettermiddag. Prisen på amerikansk lettolje var torsdag ettermiddag 55,3 dollar fatet, drygt ein dollar meir enn torsdag. Prisveksten den siste veka har vore nesten 6 prosent.
(©NPK)
Oslo Børs har auka med 4 prosent den siste veka. Foto: Stian Lysberg Solum / NTB scanpix
