Kenyansk politi: Angriparane er framleis inne i hotellet

Spesialstyrkar jaktar på angriparar som er inne i hotellet i Nairobi, bekreftar kenyansk politi.

Det er tidlegare komme ubekrefta meldingar om at seks angriparar vart sett på veg inn i bygninga på adressa 14 Riverside, som husar luksushotellet DusitD2 og ei rekkje kontor.

I ei fråsegn via Twitter opplyser dei nasjonale politistyresmaktene i Kenya at ei gruppe væpna angriparar angreip Dusit-komplekset i 15-tida lokal tid.

- Sikkerheits- og nødteam reagerte med ein gong på hendinga og har sperra av området. Situasjonen blir handtert, og bebuarar blir sjekka og evakuerte frå området. Vi er klar over at væpna kriminelle er i hotellet, og spesialtrente styrkar jobbar med å jage dei ut, heiter det i fråsegna.

Politiet bekreftar samtidig at det er skadde i angrepet.

- Vi jobbar med å bekrefte talet på og typar skadar og vil komme tilbake med meir informasjon, så raskt som han er tilgjengeleg.

Rapportar frå resten av landet tyder på rolege og normale forhold, skriv politiet vidare.

Ekstremistgruppa al-Shabaab har teke på seg ansvaret for angrepet.

(©NPK)

Annonse
Annonse