Kjendisar engasjerer seg for Amazonas - men med misvisande bilde

Både popartisten Madonna, fotballspelaren Cristiano Ronaldo, filmstjerna Leonardo DiCaprio og Frankrikes president Emmanuel Macron har brukt sosiale medium til å åtvare mot dei katastrofale følgjene som brannane i Amazonas kan få.

Men felles for dei alle er at dei òg har lagt ut bilde som enten er fleire år gamle eller som er tatt heilt andre stader enn Amazonas, og som bidrar til å villeie millionar av følgjarar.

Offisielle tal viser at det er registrert nesten 73.000 brannar i Brasil sidan årsskiftet, noko som er ein skarp auke sidan i fjor, og det høgaste talet som er registrert i Brasil sidan registreringane byrja i 2013. Brannane skaper stor bekymring sidan dei blir knytte til avskoging av den største regnskogen i verda, som igjen er svært viktig for å avgrense global oppvarming.

Død fotograf

Bildet som Macron har brukt i Twitter-innlegget sitt med emneknagg #ActForTheAmazon , kan likevel ikkje vere frå årets brannar sidan det er tatt av den amerikanske fotografen Loren McIntyre, som døydde i 2003.

Bildet er delt av fleire andre kjendisar, mellom anna filmstjerna Leonardo DiCaprio, Formel 1-førar Lewis Hamilton, Brasils fotballkaptein Dani Alves og popstjerna Ricky Martin.

Chiles president Sebastian Pinera har òg lagt ut eit gammalt bilde. Det vart tatt av Reuters-fotografen Nacho Doce i 2013.

30 år sidan

Skodespelaren og rapparen Jaden Smith har lagt ut eit dramatisk bilde på Instagram som viser ein stor skogbrann med enorme røykskyer. Men bildet, som har fått over 1,5 millionar «likes», er tatt i 1989.

Det same bildet er mellom anna delt av Madonna og tennisstjerna Novak Djokovic

Den argentinske skodespelaren og songaren Martina Stoessel har òg delt eit gammalt bilde på Twitter, som har fått kommentaren «Så trist dette er ...". Det vart tatt i 2014 av fotografen Mario Toma frå Getty Images.

(©NPK)

Eit satellittbilde tatt 15. august 2019 frå Maxar Technologies av ein brann sørvest for Porto Velho i Brasil. Foto: Maxar Technologies via AP / NTB scanpix

Fotballspelaren Cristiano Ronaldo frå Portugal er blant dei som har lagt ut bilde som ikkje viser dei brannane som er no i Brasil. Bildet han har publisert på Instagram, vart tatt i mars 2013 og er frå Rio Grande do Sul. Delstaten ligg i Brasil, men ikkje i Amazonas. Ronaldo har 180 millionar følgjarar på Instagram. Arkivfoto: Luca Bruno / AP / NTB scanpix