Klart ja frå YS- og Unio-medlemmer i uravstemming til lønnsoppgjeret i staten
Eit klart fleirtal av medlemmene i forbunda i hovudsamanslutningane YS Stat og Unio stat har stemt ja til resultatet i meklinga i det statlege området.
Over 80 prosent av dei som stemde av medlemmene i Unio stat, stemde ja til resultatet i meklinga i det statlege området. Berre 34 prosent av medlemmene avla stemme. Røystene mellom ja og nei er nokså likt fordelt i alle forbunda, med unntak av Sjukepleiarforbundet der «berre» 61 prosent stemde ja.
Forhandlingsutvalet i Unio stat har einstemmig vedteke det anbefalte meklingsforslaget som ny tariffavtale, og brev er oversendt Riksmeklaren fredag.
Av medlemmene i YS Stat som deltok i uravstemminga, stemde 81 prosent ja. 40,5 prosent av medlemmene deltok i avstemminga.
Avstemminga er å rekne for rådgivande, og styret i YS Stat følgde opp med eit einstemmig ja.
– YS Stat er fornøgd med eit klart svar frå medlemmene på eit lønnsoppgjer med heilt spesielle føresetnader, seier YS Stat-leiar Pål N. Arnesen.
(©NPK)
