Kommunaldepartementet utset avgjerd i Kvænangen
Kommunaldepartementet vil i byrjinga av neste veke avgjere om dei godtar at eit førehandsstemme-lokale i Kvænangen stengde for tidleg, melder NRK.
- Kommunen får beskjed om avgjerda til departementet før konstitueringa av det nye kommunestyret onsdag, seier ordførar Eirik Losnegaard Mevik til NRK.
Gjennomføringa av kommunevalet i Kvænangen har ført til ein politisk thriller. Måndag møttest valstyret for å legge inn resultata på nytt etter nyteljing. Då vart det likevel oppdaga nye feil og møtet avbrote.
Éi forkasta stemme frå valet i kommunen må vurderast på nytt, vedtok valstyret tysdag. Stemma vart under oppteljinga forkasta, fordi det var uklart om veljaren var stemmefør.
Ap og Sp knivar om det siste mandatet, eit mandat som kan avgjere kva for eit parti som får ordføraren.
(©NPK)
