Kommunar i Ålesundregionen lempar på tiltaka

Frå midnatt lettar kommunane Ålesund, Sula og Giske på koronatiltaka i ei ny lokal forskrift. Mellom anna blir det tillate med skjenking utan matservering.

I den nye forskrifta, som gjeld frå midnatt til 8. juni, blir det mellom anna tillate for aktivitet for barn på tvers av kommunegrensene.

Bruk av heimekontor er no berre eit råd, og det blir gjort målretta tiltak mot situasjonar der smitte oftast skjer. Det vil framleis vere påbod om munnbind der ein ikkje kan halde ein meters avstand.

Det blir òg opna for skjenking av alkohol fram til klokka 22, men berre ved bordservering. Det er ikkje lenger eit krav om matservering til skjenkinga.

Kommunane opplyser at det kan lettast ytterlegare opp dersom smittetrykket betrar seg

– Ålesundregionen opnar meir opp, men situasjonen tilseier at vi må halde litt igjen, seier ordførar Eva Vinje Aurdal (Ap) i Ålesund.

– Vi ser at smitten skjer mest i private heimar og tette sosiale samanhengar, og vi vil derfor gradvis nærme oss den nasjonale gjenopninga, seier ordføraren.

(©NPK)

Ålesund er ein av tre kommunar i regionen som lettar litt på koronatiltaka. Foto: Halvard Alvik / NTB / NPK

Annonse
Annonse