Kongefamilien kvittar seg med fossilbilane – har fått fleire nye elbilar

Kongefamilien er i gang med ei historisk utskifting av bilparken. For første gong har dei fått offisielle elbilar, og på sikt vil dei slutte med fossilbilar.

– Målet til kongehuset er å byte ut alle fossildrivne køyretøy med køyretøy som er drivne av fornybar energi, så langt dette er både mogleg og praktisk gjennomførbart, opplyser kommunikasjonssjef Guri Varpe på Slottet til NTB.

Den siste tida har kongefamilien dukka opp i fleire nye bilar ute på oppdrag.

Inntil nyleg var ingen av dei offisielle bilane til kongehuset heilelektriske, men no er fleire av dei det.

Her er ei oversikt:

  • Nyleg tok kongefamilien i bruk ein elbil med skilta A8. Dette er ein Mercedes EQs 580 4MATIC med rekkjevidd på opptil 668 kilometer. Den har ein startpris på over 1,3 millionar kroner i Noreg.
  • I desember fekk kongefamilien ein ny BMW i7, som har fått skiltet A6. Modellen er heilt ny på marknaden, og kongefamilien har truleg fått eit av dei aller første eksemplara som har komme til Noreg. Bilen har ein startpris på 1,1 millionar kroner i Noreg.
  • I desember dukka kronprinsparet opp i ein ny limousin med skilta A3. Dette er ein Volvo S90 ladbar hybrid, som har fått ei ekstra seterad.
  • Kongehuset har også fått ein ny heilelektrisk Mercedes EQV van/fleirbruksbil, som ved offisielle oppdrag bruker skilta A10. Bilen har ein startpris på rundt 800.000 kroner i Noreg.
  • I tillegg eig prinsesse Astrid ein heilelektrisk bil som har skilta A9 når han blir brukt offisielt.

Brukar leasingbilar

Fleire av representasjonsbilane til kongefamilien er leasa. Det same gjeld bilane staben på Slottet bruker.

– Ved utløp av leasingperioden byter vi fossilbilar med elektriske/hybride bilar så sant det er mogleg, seier Varpe.

Det er dette som har skjedd med dei fleste nyinnkjøpa til kongefamilien.

– Unntaket er A3 som er ein kjøpt hybridbil, seier Varpe.

Alle dei offisielle bilane til kongefamilien har veldig korte skiltnummer, med berre bokstaven A og eit tal. Mest kjent er kanskje A1 – også kalla frigjeringsbilen, ein Buick Roadmaster frå 1939. Denne og andre historiske fossilbilar vil etter alle solemerke bli verande i samlinga til kongefamilien.

Lang elbil-historie

Sjølv om kongefamilien no har fått sine første offisielle elbilar, har kronprinsparet lenge køyrt elbil privat. I nyare tid har dei mellom anna brukt ein Tesla.

Men allereie i perioden frå 2003 til 2012 køyrde kronprinsen rundt i ein liten norskprodusert Think-elbil. Kronprinsen har fortalt at bilen måtte ladast allereie etter den korte turen frå Skaugum til Slottet – i alle fall på vinteren. På veg tilbake gjekk det nesten gale mange gonger.

– Eg hadde mange gonger rekkeviddeangst i bakkane opp mot Skaugum, i sånn 10–15 kilometer i timen det siste stykket, sa kronprinsen i februar i fjor, då kongehuset stilte ut mange av dei historiske bilane sine.

Faktisk eigde kongehuset ein elbil allereie i 1913. Det var rett nok ein Cadillac-leikebil som kronprins Olav fekk i julegåve av bestemor si, dronning Alexandra av England. Bilen er i dag eigd av Teknisk museum i Oslo.

(©NPK)

A-6: Denne bilen, av typen BMW i7, tok kongefamilien i bruk i desember. NTB observerte han for første gong i samband med opninga av Follobanen 12. desember. Modellen er heilt ny på marknaden i Noreg, og kongefamilien har truleg fått eit av dei første eksemplara. Foto: Lise Åserud / NTB

A-8: Denne nye elbilen, ein Mercedes EQs 580 4MATIC, tok kongefamilien i bruk i sommar. Her er bilen i bruk då kronprinsesse Mette-Marit deltok under utdelinga av Bibliotekets litteraturpris på Bærum bibliotek Bekkestua i slutten av november. Steffen Kverneland vart tildelt prisen. Foto: Lise Åserud / NTB

A-8 fotografert bakfrå. Foto: Lise Åserud / NTB

Denne Volvoen med skilta A3 er også ny. Det er ein Volvo S90 hybrid med ein ekstra seterad. Foto: Terje Bendiksby / NTB

Denne ørvesle Think-elbilen køyrde kronprinsen rundt med i fleire år på 2000-talet. Foto: Bjørn Sigurdsøn / NTB

Denne vesle Cadillac-elbilen er faktisk kongehusets aller første elbil. Kronprins Olav fekk han i julegåve av dronning Alexandra av England. Her sit han sjølv bak rattet og er saman med tre kameratar. Arkivfoto: NTB

Annonse
Annonse