Konkurransetilsynet følgjer nøye med på leverandørar av smittevernutstyr
Konkurransetilsynet vurderer om dei skal melde leverandørar av smittevernutstyr som utnyttar korona-situasjonen, til politiet.
Bergen kommune har fått tilbod om å kjøpe munnbind til femti gonger normalpris, medan Helse sør-aust har fått tilbod på munnbind som er ti gonger høgare enn normalpris.
Dette har fått Konkurransetilsynet til å reagere, skriv Bergens Tidende.
Tilsynet kan ved kriser ta i bruk pristiltakslova, som forbyr urimelege prisar og forretningsvilkår, og gir høve til å regulere prisar på viktige varer og tenester.
Konkurransedirektør Lars Sørgard seier dei vil overvake denne marknaden nøye, men vil ikkje utdjupe om det er spesielle aktørar som blir spesielt overvakte.
– Vi kan setje ein maksimalpris på produkta. Og viss vi ser døme på prisar som er heilt ute av proporsjonar i forhold til kva det kostar å produsere vara, kan vi melde dei, seier Sørgard til avisa.
(©NPK)
Direktør Lars Sørgard hos Konkurransetilsynet vurderer å politimelde leverandørar av smittevernutstyr som utnyttar korona-situasjonen. Foto: Marit Hommedal / NTB scanpix