Korona på Europa-frammarsj: Fleire land innfører nye tiltak

Det siste døgnet er det meldt om 454 nye koronasmitta i Danmark – det høgaste talet på eitt døgn så langt. Landet innfører laurdag strenge nasjonale restriksjonar for å redusere smittespreiinga.

Mellom anna må alle restaurantane i landet og barar stengje klokka 22. Det blir òg innført strengare munnbindreglar og forbod mot samlingar med over 50 personar. Unntaket er arrangement der ein kan sitje, som har eit tak på 500 personar.

Frankrike

Også Frankrike er bekymra for utviklinga den seinaste tida. Landet har for første gong sidan i vår meldt om ein auke i talet på koronadødsfall. Denne veka har 265 koronasmitta personar døydd, samanlikna med 129 veka før.

Det er dessutan meldt om større pågang på sjukehuset i landet.

Island

Også Island strammar inn som følgje av auka smitte. Det er mellom anna bestemt at alle barar og utestader i hovudstaden Reykjavik må halde stengt dei neste fire dagane.

Den siste veka har Island meldt om 59 nye smittetilfelle, og 58 er knytte til hovudstadsregionen.

Storbritannia

Storbritannia ser heller ikkje bort frå at det kan bli innført ei ny nasjonal nedstenging.

– Vi er klare til å gjere det som trengst for å verne liv og livsgrunnlaget til folk, sa helseminister Matt Hancock fredag.

Same dag tok regionale nedstengingar til å gjelde nordaust i England. Tiltaka påverkar rundt to millionar menneske i områda rundt byen Newcastle. Måndag vedtok styresmaktene òg eit forbod mot samlingar på meir enn seks personar.

Samtidig opplyser regjeringa at det vil bli innført nye tiltak i delar av Midlands og West Yorkshire frå tysdag.

Spania

I Spania åtvarar helsearbeidarar om at sjukehusa manglar kapasitet til å behandle alvorleg koronasjuke pasientar, fortel nyheitsbyrået AFP.

Fredag vart det òg innført delvis nedstenging, som påverkar rundt 13 prosent av innbyggjarane i hovudstadsregionen.

Smittespreiinga i Madrid-regionen er rundt seks gonger høgare enn i resten av landet. Militære telt er sett opp ved eit militærsjukehus i Madrid der koronapasientar skal få behandling. Målet er å avlaste sjukehuset i byen, opplyser nyheitsbyrået AP.

Verst i Spania

Spania har for tida den alvorlegaste smittespreiinga i EU/EØS, med 292 nye smitta per 100.000 innbyggjarar siste to veker.

Det tilsvarande talet for Frankrike er 172, Danmark 69, Storbritannia 62 og Island 22.

Noreg og Sverige har påvist høvesvis 27 og 30 smittetilfelle per 100.000 innbyggjarar dei siste 14 dagane.

(©NPK)

Danmarks statsminister Mette Frederiksen kunngjorde fredag nye strenge nasjonale koronarestriksjonar. Foto: Martin Sylvest / Ritzau scanpix via AP / NTB

Folk i London stod fredag i kø ved eit koronatestsenter. No åtvarar helseministeren i landet, Matt Hancock, om at ei ny nasjonal nedstenging kan bli nødvendig. Foto: Kirsty O'Connor / PA via AP / NTB

I Frankrike er styresmaktene bekymra for at talet på koronadødsfall stig på nytt. Foto: Michel Euler / AP / NTB

Militære telt er sette opp for å ta hand om koronapasientar i Madrid. Foto: Manu Fernandez / AP / NTB