Nordre

Årets verste dag på Oslo Børs

Onsdag vart årets verste dag på Oslo Børs etter kraftig nedgang. Hovudindeksen gjekk ned heile 2,39 prosent og enda på 822,67 poeng ved børsslutt.

Fallet starta for alvor i 14.30-tida. Børsen var då ned over 2 prosent etter eit breitt fall i aksjeverdiane. Indeksen enda med ein nedgang på 2,39 prosent, som er den største nedgangen hittil i år, ifølgje E24.

Ved slutten av børsdagen var det nedgang blant alle dei mest omsette selskapa. Størst nedgang hadde Yara med 3,8 prosent og DNB med 3,3 prosent. Også Hydro (-3,2), Equinor (-3) og Telenor (-0,3) enda ned.

Også selskapa Aker BP (-4,3) og DNB (-3,2) var blant dei store selskapa som hadde nedgang onsdag.

Oljeprisen fall

Prisen på eit fat nordsjøolje fall under 60 dollar og var ved 16.30-tida onsdag ned snautt 3 prosent til rundt 59,4 dollar. Prisen på amerikansk lettolje (WTI) har gått kraftig ned. Eit fat blir omsett for 54,82 dollar, ned 2,28 dollar.

I alle sektorar på Oslo Børs var det eit fleirtal av selskap med nedgang. Aller størst nedgang hadde entreprenørselskapet Seadrill som gjekk ned 16,5 prosent.

Størst nedgang var det i energisektoren, som enda ned 3,6 prosent.

På ein mørk børsdag vart banken BRAbank dagens vinnar, med ein oppgang på 10 prosent.

Tysklands økonomi krympar

Fallet på hovudindeksen reverserer oppgangen på tysdag på 0,9 prosent - ei utvikling som vart sett i samanheng med nyheita om at USA utset innføringa av auka tollsatsar på ei rekke kinesiske varer.

Ferske tal frå Tyskland onsdag viste at økonomien i landet krympa med 0,1 prosent i andre kvartal. Fenomenet blir tolka som eit resesjonsvarsel. Samtidig kjem det meldingar frå USA og Storbritannia om svake renteutsikter.

Samtidig vart det i Kina offentleggjort svake tal for industriproduksjon, forbruk og investeringar i juli.

Nedgang i Europa, USA og Asia

I USA fall aksjekursane då børsane opna i New York onsdag. Dow Jones-indeksen gjekk ned over 1 prosent.

Ein dryg time seinare hadde indeksen falle 1,7 prosent, medan den teknologitunga Nasdaq-indeksen låg over 2 prosent lågare enn sluttnoteringa dagen før.

Også på dei viktigaste børsane i Europa var det nedgang. DAX 30 i Frankfurt enda ned 2 prosent, CAC 40 i Paris enda ned 1,9 og FTSE 100 i London enda ned 1,5.

I Asia stengde Nikkei-indeksen i Tokyo ned 0,9 prosent, medan Hang Seng i Hongkong enda ned 0,1.

Onsdag svekte den norske krona seg med 0,04 prosent mot euro. 1 euro kostar no 10 kroner. Mot amerikanske dollar styrkte krona seg med 0,3 prosent, noko som inneber at 1 dollar kostar 8,94 kroner.

(©NPK)

Illustrasjonsfoto: Håkon Mosvold Larsen / NTB scanpix

ANNONSE
Annonse
ANNONSE
Annonse